ITV Cymru yn ystyried torri rhaglen Saesneg a swyddi cynhyrchwyr

- Cyhoeddwyd
Mae ITV Cymru yn bwriadu dod â dwy raglen i ben a lleihau nifer y cynhyrchwyr yn eu hystafell newyddion yng Nghaerdydd.
Dywedodd y darlledwr y byddai'r toriadau yn "helpu i leddfu rhywfaint o bwysau costau" a hefyd yn caniatáu i'w timau Saesneg "weithio'n fwy hyblyg".
Cadarnhaodd ITV eu bod yn cynnig dod â'r rhaglen Coast and Country a'r rhaglen gelfyddydau ac adloniant wythnosol, Backstage, i ben.
Nid yw'r cynigion yn effeithio ar faint o raglenni newyddion a materion cyfoes sy'n cael eu darlledu gan ITV Cymru bob wythnos, na chwaith y rhaglenni sy'n cael eu cynhyrchu gan ITV i S4C.
Dywedodd llefarydd fod y darlledwr wedi dechrau ymgynghori â staff ar ôl cadarnhau'r newyddion fore Mawrth.
Mae rhaglen Coast and Country yn cael ei darlledu ers dros ddegawd, gan ganolbwyntio ar gymunedau gwledig, yr amgylchedd a chefn gwlad Cymru.
Y cyflwynydd tywydd Ruth Dodsworth a Sean Fletcher sydd wedi bod wrth y llyw.
Mae BBC Cymru yn deall y gallai nifer y cynhyrchwyr sy'n gweithio yn ITV Cymru leihau o chwech i ddau fel rhan o'r ailstrwythuro, tra gallai ymdrechion i leihau gwariant olygu bod mwy o raglenni'n cael eu darlledu o'r stiwdio yn hytrach nag ar leoliad.

Fe ITV yn mynd i ddwylo Sky os ydy cytundeb rhwng y darlledwyr yn llwyddiannus
Dywedodd llefarydd ar ran ITV Cymru Wales fod y diwydiant ehangach o dan "bwysau economaidd sylweddol" a bod y cynigion yn rhan o ymdrechion i ddelio â rhywfaint o'r straen ariannol hwnnw.
Ychwanegodd fod y cynllun yn cynnwys "ailstrwythuro rhai o'r timau sy'n gwneud ein rhaglenni iaith Saesneg er mwyn ein galluogi i weithio'n fwy hyblyg," tra'n diogelu'r ymrwymiadau sydd ganddynt i'r gynulleidfa ac i'r rheoleiddiwr, Ofcom.
Yn gynharach eleni, cytunodd Sky i dalu £1.6bn i brynu gweithrediadau darlledu a ffrydio ITV, gan adael ITV Studios fel cwmni ar wahân. Mae'r cytundeb yn destun craffu ar hyn o bryd, ac efallai na fydd yn mynd yn ei flaen tan ddiwedd 2027.
Mae'r diwydiant darlledu ehangach hefyd o dan straen.
Ym mis Medi, cyhoeddodd BBC Cymru y byddai'n torri 58 o swyddi fel rhan o ymdrechion ehangach ar draws y BBC i arbed £500m.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.