Carcharu dyn am dorri mewn i gartref a dinoethi ei hun o flaen plant

 Mohammed AbbasFfynhonnell y llun, Heddlu De Cymru
Disgrifiad o’r llun,

Cafodd Abbas ei ddisgrifio fel "bygythiad gwirioneddol ac uniongyrchol" i ferched

GanGwen Aeron
BBC Cymru Fyw
  • Cyhoeddwyd

Rhybudd: Gallai'r cynnwys isod beri gofid i rai

Mae dyn o Balesteina wedi cael ei garcharu am chwe blynedd ar ôl torri mewn i gartref teulu yng Nghaerdydd a dinoethi ei hun o flaen merched ifanc.

Clywodd Llys y Goron Caerdydd fod Mohammed Abbas, 29, wedi mynd i mewn i'r cartref yn ystod oriau mân y bore ac wedi mynd i un o'r ystafelloedd gwely ble roedd dwy ferch ifanc yn cysgu gyda'u chwaer hŷn.

Fe wnaeth Abbas, sy'n geisiwr lloches sydd wedi bod yn y DU ers mis Mawrth, ddinoethi ei hun o flaen y merched a chyflawni gweithred rywiol ar ei hun o'u blaenau.

Wrth ei ddedfrydu ddydd Mawrth, dywedodd y barnwr Lucy Crowther, fod Abbas - oedd eisoes wedi pledio'n euog i sawl cyhuddiad yn ei erbyn - yn peri "bygythiad gwirioneddol ac uniongyrchol" i fenywod a merched.

Abbas 'yn gwrcwd yng nghornel yr ystafell'

Clywodd y llys fod Abbas wedi bod yn yfed alcohol ac yn cerdded strydoedd Caerdydd yn oriau mân 30 Gorffennaf, pan ddechreuodd geisio agor ffenestri tai.

Ar ôl llwyddo i dorri mewn i'r tŷ, clywodd y llys fod un o'r merched wedi deffro am tua 02:00 a gweld Abbas yn gwrcwd yng nghornel yr ystafell.

I ddechrau, roedd hi'n meddwl mai ei brawd oedd yno a galwodd arno. Atebodd Abbas drwy ddweud "sori". Dechreuodd y ferch sgrechian, gan ddeffro ei chwiorydd.

Dywedodd un ohonynt ei bod wedi gweld Abbas yn gadael yr ystafell am gyfnod byr, ond dychwelodd yn fuan a dechrau cyflawni gweithred rywiol ar ei hun.

Dywedodd y barnwr ei fod wedi gofyn dro ar ôl tro i'r merched a oedden nhw eisiau cael rhyw gydag ef.

"Yn hytrach na gadael ar ôl clywed y sgrechian," meddai'r barnwr, "fe symudais di'n agosach at y merched".

Gwelodd un o'r merched Abbas yn ceisio dringo un o'r gwelyau bync tra'i fod wedi mynd mor agos at un o'r merched nes iddi ei daro â gobennydd sawl tro.

Clywodd y llys fod y sŵn wedi deffro aelodau eraill o'r teulu, a'u bod wedi troi'r goleuadau ymlaen. Fe wnaeth hynny beri i Abbas ffoi o'r tŷ.

Daeth i'r amlwg yn ddiweddarach fod Abbas hefyd wedi dwyn clustffonau oedd yn eiddo i un o'r merched, yn ogystal â siaced oedd yn berchen i'r tad.

'Oes o ddychryn i'r merched'

Dywedodd y barnwr fod y digwyddiad wedi para tua munud a hanner, ond y byddai wedi teimlo fel oes o ddychryn i'r merched.

Dywedodd nad oedd ganddo "unrhyw ystyriaeth i'r teulu na'r tair merch ifanc".

Ychwanegodd fod "ei ymddygiad wedi ymwneud yn llwyr â'i foddhad rhywiol ei hun, beth bynnag oedd y gost i eraill".

Cafodd Abbas ei adnabod drwy luniau teledu cylch cyfyng o eiddo cyfagos a cafodd ei arestio yn y llety yng Nghaerdydd lle'r oedd yn byw ar ei ben ei hun.

I ddechrau, gwadodd y troseddau mewn cyfweliad gyda'r heddlu, ond yn ddiweddarach fe blediodd yn euog i fyrgleriaeth, tresmasu ar eiddo gyda'r bwriad o gyflawni trosedd rywiol, a dau gyhuddiad o gyflawni gweithgarwch rhywiol ym mhresenoldeb plentyn.

Clywodd y llys hefyd ei fod wedi mynegi safbwyntiau gelyniaethus tuag at fenywod yn y gorffennol, a'i fod wedi cyflawni gweithredoedd anweddus o flaen staff y ers cael ei gadw yn y ddalfa.

Dywedodd y barnwr y gallai wynebu cael ei alltudio o'r DU ar ôl cwblhau ei gyfnod yn y carchar.

Mewn datganiad a ddarllenwyd i'r llys, dywedodd mam y merched mai'r peth anoddaf oedd gwybod na allai ddileu'r atgofion o feddyliau ei merched.

Dywedodd ei bod yn gallu eu cysuro a'u cefnogi, ond nad oedd modd iddi newid yr hyn oedd wedi digwydd.

Ychwanegodd fod y digwyddiad wedi effeithio ar les emosiynol ei merched, eu haddysg a'u gallu i deimlo'n ddiogel yn eu cartref eu hunain.

"Mae pob plentyn yn haeddu teimlo'n ddiogel yn ei gartref ei hun," meddai.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.