Problemau Microsoft wedi effeithio ar wasanaethau cyfathrebu drwy Gymru

Mae'r problemau gyda thechnoleg cwmni Microsoft wedi cael effaith ar wasanaethau cyfathrebu ar draws y wlad
- Cyhoeddwyd
Mae sefydliadau a gwasanaethau drwy Gymru wedi cael trafferthion gyda'u systemau cyfathrebu, yn sgil problemau sylweddol byd-eang gyda gwasanaethau cwmni technoleg Microsoft.
Daeth i'r amlwg nos Iau bod yna broblemau gyda gwasanaethau Teams, Outlook a'r feddalwedd deallusrwydd artiffisial Copilot - oedd yn effeithio ar ddegau ar filoedd o ddefnyddwyr mewn degau o wledydd.
Dywedodd Llywodraeth Cymru eu bod yn cadw golwg ar effaith y problemau ar eu gwasanaethau, wrth i nifer o sefydliadau a chyrff yng Nghymru addasu eu ffyrdd o gyfathrebu.
Yn ôl Microsoft, gormod o bwysau ar eu rhwydwaith achosodd y problemau, gan ddweud brynhawn Gwener eu bod yn parhau i weld "gwelliannau", a bod y systemau e-bost yn nesáu at gyrraedd "lefelau normal", ond y gallai rhai defnyddwyr barhau i brofi "problemau ysbeidiol".
Dywedodd Microsoft hefyd nad ymosodiad seibr oedd wedi achosi'r problemau.
Pwy sydd wedi eu heffeithio?
Dywedodd Llywodraeth Cymru mewn datganiad fore Gwener eu bod yn "monitro'r effaith ar wasanaethau'r Llywodraeth ac yn defnyddio trefniadau wrth gefn yn ôl yr angen".
Ymysg eraill gafodd eu heffeithio roedd systemau cyfathrebu'r gwasanaethau brys.
Dywedodd Heddlu De Cymru a Heddlu Dyfed Powys eu bod yn cael trafferthion derbyn adroddiadau drwy eu ffurflenni ar-lein arferol, gan ofyn i bobl gysylltu â nhw gyda materion oedd ddim yn rhai brys drwy'r system ffôn 101.
Dywedodd Gwasanaeth Tân ac Achub Gogledd Cymru nad oedden nhw yn gallu derbyn nac ymateb i e-bost neu ymholiadau drwy eu gwefan, ond eu bod yn parhau i weithredu'n llawn ac yn ymateb i argyfyngau.
Mae cynghorau, gan gynnwys Cyngor Rhondda Cynon Taf, Casnewydd, Abertawe a Phowys hefyd wedi methu defnyddio eu system e-bost, gan ei gwneud hi'n anodd derbyn negeseuon ac ymateb i ymholiadau.
Dywedodd Cymdeithas Llywodraeth Leol Cymru:
"Mae cynghorau yn dweud bod materion yn parhau i fod o dan reolaeth, gyda thrafferthion Microsoft heb effeithio'n sylweddol ar wasanaethau.
"Mae'r rhan fwyaf o wasanaethau cefn swyddfa heb eu heffeithio, ac mae gan gynghorau gynlluniau parhad busnes yn eu lle, i sicrhau eu bod yn gallu parhau i gyfathrebu'n fewnol a chyda'r cyhoedd drwy ddulliau eraill pan fo angen.
"Mae CLlLG yn cadw mewn cysylltiad â chynghorau ac yn parhau i fod wrth law i gynnig cefnogaeth a chymorth yn ôl yr angen."
'Byddwch yn amyneddgar'
Dywedodd llefarydd ar ran Cymdeithas Genedlaethol y Fferyllwyr eu bod yn ymwybodol o darfu ar wasanaethau fferyllfeydd, gan gynnwys mynediad at systemau ebost y GIG.
"Mae hyn yn effeithio ar allu fferyllfeydd i gyfathrebu gyda meddygfeydd a rhai cleifion," meddai'r llefarydd.
"Byddwch yn amyneddgar gyda eich timau fferyllol heddiw, gan y gallai'r aros fod yn hirach na'r arfer, ac fe allai yna fod oedi gyda rhai presgripsiynau."
Dywedodd byrddau iechyd Cymru mewn datganiad eu bod yn ymwybodol o'r problemau gyda thechnoleg Microsoft, ac "o ganlyniad, fe allai yna fod oedi wrth dderbyn, cael mynediad at, a chael ymateb i ymholiadau."
"Rydym yn ymddiheuro am unrhyw anghyfleustra y gallai hyn ei achosi, ac yn gofyn i gleifion fod yn amyneddgar tra bod y mater byd-eang yma yn cael ei ddatrys."
Dywedodd Iechyd a Gofal Digidol Cymru eu bod yn cydlynu'r ymateb a'r trefniadau ar ran GIG, a'u bod mewn "cyswllt uniongyrchol gyda Microsoft, wrth iddyn nhw adfer gwasanaethau allweddol."
Fe ddywedon nhw bod gwasanaethau wyneb-yn-wyneb gyda chleifion yn gweithredu yn ôl yr arfer, ac y dylai cleifion barhau i fynd i'w hapwyntiadau, oni bai eu bod yn cael gwybod yn wahanol.
Dylai cleifion barhau i ddefnyddio'r gwasanaeth 999 mewn achosion o argyfwng neu pan fo bywyd mewn perygl, a defnyddio GIG 111 ar-lein neu ar y ffôn, neu eu fferyllfa leol am wybodaeth a chyngor meddygol.

Dywedodd Chris Allen o gwmni Travel House ym Merthyr Tudful eu bod wedi defnyddio "llawer mwy o bapur na'r arfer" oherwydd nad oedd posib e-bostio manylion teithio i gwsmeriaid
Fe effeithiodd y problemau ar nifer o fusnesau hefyd, gyda chwmni gwyliau Travel House ym Merthyr Tudful yn dweud nad oedden nhw'n gallu cysylltu â chwsmeriaid gyda chadarnhad o'u trefniadau gwyliau.
Dywedodd Chris Allen sy'n gweithio i'r cwmni nad oedden nhw'n gallu e-bostio manylion hedfan fel yr arfer i gwsmeriaid, gan olygu bod rhai wedi gorfod teithio i'r siop pan nad oedden nhw wedi disgwyl gorfod gwneud hynny.
"Mae llawer mwy o bapur yn cael ei ddefnyddio sydd ddim mor eco-gyfeillgar," meddai Chris.
"Mae'n llawer mwy o waith. Fel arfer rydych chi'n gallu clicio botwm yn unig, ond nawr mae'n rhaid mynd i mewn i systemau gwahanol i gael mynediad at bethau."

Roedd y myfyrwyr Louie, Jack a Vinney mewn hwyliau da ar ôl cael eu hanfon adref yn gynnar o Goleg Merthyr
I eraill roedd y problemau wedi golygu dydd Gwener mwy hamddenol na'r arfer, gyda Louie, Jack a Vinnie sy'n fyfyrwyr yng Ngholeg Merthyr mewn hwyliau da wrth gerdded drwy'r dref ar ôl cael eu hanfon adref yn gynnar o'r coleg.
Dywedodd Jack, 16 bod ei wers Gymraeg wedi cael ei chanslo oherwydd bod staff yn methu cael mynediad at y feddalwedd a'r dogfennau oedd eu hangen ar gyfer y dosbarth.
"Mae'n newyddion da, rydyn ni allan yn gynnar, ac rydyn ni i gyd nawr yn mynd i'r gym," meddai.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.