Dynes yn gaeth i Sudafed am ddegawd ac wedi gwario miloedd

Louise GoughFfynhonnell y llun, Kennedy News
Disgrifiad o’r llun,

Dywedodd Louise ei bod wedi bod yn gaeth am ddegawd

GanHarri EvansBBC Cymru Fyw a Paul PigottBBC Cymru
  • Cyhoeddwyd

Mae dynes yn dweud ei bod wedi gwario miloedd ar chwistrellau trwynol ar ôl dod yn gaeth iddyn nhw am dros gyfnod o 10 mlynedd.

Roedd Louise Gough, 30, yn defnyddio'r chwistrellau i glirio'i thrwyn ond fe fethodd â darllen y print mân ar ei Sudafed, sy'n rhybuddio ei fod ar gyfer defnydd tymor byr yn unig.

Daeth mor ddibynnol ar y feddyginiaeth nes ei bod yn ei ddefnyddio hyd at 15 gwaith y dydd ac yn teimlo fel "carcharor yn ei chorff ei hun".

Dywedodd Sudafed bod defnydd diogel o'u cynhyrchion yn flaenoriaeth iddynt.

Mae llawfeddyg ymgynghorol sy'n trin y ddibyniaeth yn dweud y dylai'r rhybudd fod yn fwy amlwg ar y cynnyrch.

Mae Louise, o Gaerffili, yn amcangyfrif ei bod wedi gwario tua £2,000, gan brynu poteli sy'n costio £7 yn gyfrinachol oherwydd bod ei phartner yn rhwystredig gyda'i gwariant.

"Fe wnes i ddefnyddio nhw [pan oedd gen i annwyd] ac o fewn 10 eiliad roedd fy nhrwyn wedi'i ddadflocio," meddai.

"Roedd y rhyddhad o hynny'n anhygoel.

"Mae'n rhannol fy mai i. Do'n i ddim wedi darllen y pecyn a do'n i ddim wedi sylweddoli mai dim ond am gyfnod penodol ti fod i ddefnyddio nhw.

"Wnaeth neb rybuddio fi pan o'n i'n prynu nhw. Wnaeth o droi yn gylch dieflig iawn."

'Carcharor yn fy nghorff fy hun'

Gall defnydd hirdymor waethygu'r broblem, felly hyd yn oed pan nad oedd gan Louise annwyd, byddai ei thrwyn yn llawn a byddai'n defnyddio'r chwistrell.

Datblygodd gyflwr rhinitis medicamentosa - sy'n golygu fod y trwyn wedi'i flocio o hyd o ganlyniad i ddefnydd parhaol o'r feddyginiaeth.

"Ro'n i'n teimlo'n bryderus iawn os doedd ddim potel gen i," meddai.

"Roedd o'n ddrwg yn enwedig os o'n i allan gyda fy mhartner achos byddwn i'n gofyn iddo gael un i fi a byddai o'n mynd yn rhwystredig.

"Dwi'n chwerthin am y peth nawr ond doedd e ddim yn ddoniol ar y pryd.

"Ro'n i'n teimlo fel carcharor yn fy nghorff fy hun a do'n i ddim yn gallu dianc oddi wrtho."

Louise GoughFfynhonnell y llun, Kennedy News
Disgrifiad o’r llun,

Dywedodd Louise ei bod yn teimlo'n bryderus pan nad oedd ganddi ei chwistrell

Dywedodd yr ymgynghorydd clust, trwyn a gwddf (ENT) Vik Veer fod chwistrellau o'r fath yn gweithio trwy gyfyngu llif y gwaed i leinin y trwyn dros dro.

Gall defnydd hirfaith achosi'r trwyn lenwi wrth i effaith y feddyginiaeth gilio.

"Mae'r hyn roeddech chi'n ei wneud i'ch gwella mewn gwirionedd yn eich gwneud chi hyd yn oed yn waeth," meddai.

"Bydd pob llawfeddyg ENT yn gwybod am hyn a dwi'n gweld y broblem hon bron ym mhob clinig."

Y cyngor swyddogol yw na ddylai pobl ddefnyddio chwistrellau trwynol sy'n cynnwys xylometazoline ac oxymetazoline am fwy na phum niwrnod yn olynol.

'Teimlo'n glawstroffobig yn fy nghorff fy hun'

Dywedodd Louise ei bod wedi defnyddio dwy botel lawn tra ar wyliau yng Ngroeg a'i bod hi'n gwybod ar ôl hynny bod rhaid iddi stopio.

Mae tair blynedd wedi bod ers iddi roi'r gorau i ddefnyddio'r chwistrellau.

Dywedodd ei bod hi'n teimlo'n "glawstroffobig yn fy nghorff fy hun" i ddechrau ond ar ôl mis roedd hi'n gallu anadlu drwy ei thrwyn unwaith eto.

Dywedodd llefarydd ar ran Sudafed bod eu cynhyrchion yn dilyn rheolau rheoleiddio a diwydiant llym a bod gwybodaeth am sut y dylid defnyddio'r cynnyrch ar y pecyn, taflenni gwybodaeth a'u gwefan.

Mae'r cwmni'n annog unrhyw un â chwestiynau am eu cynhyrchion i siarad â meddyg teulu neu fferyllydd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig