'Mam ymroddedig' wedi marw o 'achosion naturiol' tra'n cerdded ar Yr Wyddfa - cwest

Sophie Goodyer-BirdFfynhonnell y llun, GOFUNDME
Disgrifiad o’r llun,

Roedd Sophie Goodyer-Bird newydd ddathlu ei phen-blwydd yn 35 oed

GanGeorge Herd a Manon WiliamBBC Cymru Fyw
  • Cyhoeddwyd

Mae cwest yng Nghaernarfon wedi cofnodi trawiad gwres fel achos marwolaeth dynes 35 oed o Birmingham a fu farw ar yr Wyddfa.

Bu farw Sophie Goodyer-Bird, a oedd yn weithiwr harddwch, wrth gerdded ar y mynydd yn Eryri ar 10 Gorffennaf, ar ôl teithio yno i ddathlu ei phen-blwydd ychydig ddyddiau ynghynt.

Clywodd y cwest ei bod wedi mynd i deimlo'n flinedig iawn wrth gerdded lawr o'r copa, ac wrth agosáu at ddiwedd y daith fe ddisgynnodd Ms Goodyer-Bird yn anymwybodol a bu farw yn fuan wedi hynny.

Er gwaethaf ymdrechion y gwasanaethau brys, bu fawr yn y fan a'r lle.

Yn dilyn ei marwolaeth, cafodd ymgyrch ar-lein ei sefydlu i godi arian i'w mab 12 oed.

Mewn datganiadau i'r heddlu, disgrifiodd un ffrind ei bod yn cerdded "fel petai'n feddw".

Cynigiodd pobl oedd yn mynd heibio ddŵr iddi, tra bod timau achub mynydd wedi cael eu galw.

Clywodd y cwest fod Ms Goodyer-Bird wedi methu ymateb wedyn, a dechreuwyd wneud CPR arni.

Parhaodd ymdrechion y timau achub mynydd i'w hadfywio am bron i awr cyn iddi gael ei datgan yn farw yn y fan a'r lle.

Yn ddiweddarach, diystyrodd archwiliad post-mortem unrhyw broblemau neu glefydau cardiofasgwlaidd fel achos ei marwolaeth.

Dywedodd y patholegydd Muhammad Zain Mehdi fod y farwolaeth yn gyson â "thrawiad gwres oherwydd ymdrech gorfforol, ac yna gwymp a marwolaeth".

Dywedodd y dirprwy grwner ar gyfer gogledd-orllewin Cymru, Sarah Riley, ei bod yn derbyn y canfyddiadau hynny.

Cofnododd gasgliad fod Ms Goodyer-Bird, a oedd yn gweithio fel technegydd ewinedd, wedi marw o achosion naturiol.

Mewn datganiad a ddarllenwyd i'r gwrandawiad gan y crwner, disgrifiodd mam Sophie ei merch fel "mam ymroddedig, merch annwyl a chwaer anhygoel".

Dywedodd fod "golau wedi diffodd" pan gollon nhw Sophie.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig