Athro yn gwadu cael rhyw â disgybl mewn ysgol yng Nghaerdydd

Mae David O'Rourke yn gwadu'r holl gyhuddiadau yn ei erbyn
- Cyhoeddwyd
Rhybudd: Gallai'r cynnwys isod beri gofid i rai
Mae llys wedi clywed honiadau bod athro a disgybl wedi cael rhyw mewn swyddfa ysgol yng Nghaerdydd.
Mae David O'Rourke, 44, cyn-athro yn Whitchurch High School, wedi'i gyhuddo o naw trosedd rywiol yn ymwneud â bachgen yn ei arddegau.
Ar ddiwrnod cyntaf yr achos yn Llys y Goron Casnewydd, clywodd y rheithgor recordiad o gyfweliad yr heddlu gyda'r bachgen - na ellir ei enwi - lle mae'n honni iddo ddechrau siarad â'r athro ar yr ap Grindr cyn cael rhyw mewn swyddfa ysgol.
Mae Mr O'Rourke, a oedd yn dysgu drama, yn gwadu'r cyhuddiadau yn ei erbyn.

Roedd David O'Rourke yn athro drama yn Ysgol Uwchradd Whitchurch yng Nghaerdydd
Clywodd y llys recordiad o gyfweliad yr heddlu â'r bachgen yn 2024, lle mae'n honni nad oedd Mr O'Rourke am ddatgelu ar Grindr pwy oedd ef i'r bachgen, oedd yn 17 ar y pryd, nes iddyn nhw gael galwad fideo ar Skype.
Mae'r erlyniad yn honni bod hyn yn ymgais gan y diffynnydd i guddio pwy ydoedd, gan fod Skype yn "anoddach ei olrhain na Grindr".
Mae Mr O'Rourke, oedd yn briod â'i ŵr ar y pryd, yn gwadu iddo ddefnyddio'r ap i gwrdd â phobl.
Fodd bynnag, dywedodd yr erlynydd Andrew Davies wrth y rheithgor: "Dyna holl bwrpas yr ap - cwrdd â phobl. Dyna pam mae lleoliad arno."
Dywedodd y bachgen y byddai ef a Mr O'Rourke yn cael galwadau fideo cyson ar Skype.
Ychwanegodd fod yr athro wedi canmol ei ddewis o ddillad, cyn i'r sgyrsiau ddatblygu'n rhai "mwy eglur a rhywiol".
"Cawson ni alwad fideo arall lle wnaethon ni dynnu ein dillad," meddai.
'Roeddwn i'n teimlo cywilydd'
Esboniodd fod Mr O'Rourke wedi gofyn iddo a oedd am gwrdd ag ef yn ei swyddfa yn Whitchurch High School.
Dywedodd eu bod wedi dechrau cusanu, perfformio rhyw geneuol (oral) ar ei gilydd, a cheisio cael rhyw drwy dreiddiad (penetrative) yn swyddfa'r stiwdio ddrama.
"Doeddwn i ddim yn teimlo'n gyfforddus. Ystafell fach yw swyddfa'r stiwdio ddrama, gall unrhyw un gerdded i mewn," meddai'r bachgen.
Ychwanegodd ei fod wedi gofyn i stopio, ac yna bod Mr O'Rourke wedi dechrau cyffwrdd ei hun yn rhywiol.
"Dyna pan sylweddolais i yn union beth oedd yn digwydd," meddai.
Dywedodd fod y ddau wedi gwisgo a "sgwrsio am ychydig" cyn i'r bachgen adael yr ystafell.
Ar ôl y digwyddiad, parhaodd y ddau i gysylltu drwy Skype a Grindr, ond yn ddiweddarach fe dorrodd y bachgen gysylltiad gyda'r athro.
"Wnes i erioed deimlo fy mod mewn perygl, ond roedd y sefyllfa'n lletchwith ac roeddwn i'n teimlo cywilydd.
"Ar y pryd, roeddwn i'n cael trafferthion gyda fy iechyd meddwl. Roedd llawer yn digwydd bryd hynny. Dwi ddim yn gwybod a oedd ef wedi sylwi ar hynny."
Mae David O'Rourke yn gwadu'r holl gyhuddiadau yn ei erbyn, ac mae'r achos yn parhau.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.