'Rydym wedi gwrando' - Gŵyl Gwlad y Gân yn dileu'r ffi i aelodau unigol corau

Mae disgwyl i Andrea Bocelli berfformio yn ystod Gŵyl Gwlad y Gân yng Nghaerdydd ym mis Mai
- Cyhoeddwyd
Mae trefnwyr gŵyl gorawl yn Stadiwm Principality, Caerdydd y flwyddyn nesaf wedi dileu cost cofrestru dadleuol ar gyfer aelodau unigol y corau sy'n cymryd rhan.
Fe ddywedodd arweinyddion sawl côr na fyddai'n bosib cymryd rhan yn un o gyngherddau Gŵyl Gwlad y Gân fis Mai nesaf gan y byddai talu £42 yr aelod yn rhy uchel, a hynny ar ben ffi o £150 y côr.
Nawr mae'r trefnwyr wedi cadarnhau na fyddan nhw'n codi'r taliadau unigol mwyach, gan godi'r ffi o £150 yn unig ar bob côr.
Mewn neges ar y cyfryngau cymdeithasol, fe ychwanegodd y trefnwyr y bydd unrhyw un sydd eisoes wedi talu £42 yn cael ad-daliad.
Yn ôl prif weithredwr yr achlysur, roedd codi ffi unigol yn "anghywir" ac mae wedi diolch i bawb a heriodd y penderfyniad gan ddweud y bydd y cyngerdd "yn well o'r herwydd".
Mae'r ŵyl, sy'n cael ei chynnal rhwng 6 a 9 Mai, yn cael ei marchnata fel "un o ddigwyddiadau canu torfol mwyaf y byd".
Ar y dydd Sadwrn fe fydd y tenor Eidalaidd, Andrea Bocelli yn ymddangos fel y prif berfformiad, ac yna ar y dydd Sul, bydd corau o Gymru a thu hwnt yn perfformio ar y cyd yn y cyngerdd Côr World Choir, gan ddod â hyd at 20,000 o leisiau ynghyd "yn un o'r cynulliadau corawl mwyaf erioed".
Ond roedd yna siom ymhlith corau pan ddaeth i'r amlwg y byddai'n rhaid talu £42 ar ran pob aelod unigol, ar ben y ffi i'r côr ei hun, ac fe rybuddiodd rhai arweinyddion y byddai'n amhosib iddyn nhw gymryd rhan.
'Rydym wedi gwrando'
Mewn neges ar y cyfryngau cymdeithasol, dywedodd prif weithredwr Côr World Choir, Ben Lewis: "Gawson ni hyn yn anghywir. Ac rydym wedi gwrando."
Dywedodd mai nod yr ŵyl a chyngerdd Côr World Choir oedd dod â chorau o Gymru, y DU a'r byd at ei gilydd "ar gyfer dathliad arbennig o'r traddodiad corawl".
Ond roedd gofyn i bob aelod côr unigol dalu ffi cofrestru, yn "anghywir ac fe ddywedodd llawer ohonoch chi hynny wrthym".
"Rwy'n deall pam. Ni ddylai digwyddiad sy'n dathlu llawenydd, cymuned a chynwysoldeb greu rhwystrau diangen rhag cymryd rhan.
"Felly rydym wedi ei newid. Mae cofrestru aelodau côr unigol ar gyfer Côr World Choir nawr yn hollol DDI-DÂL.
"Os rydych eisoes wedi talu ffi cofrestru unigol, byddwch yn derbyn ad-daliad awtomatig. Does dim angen cymryd unrhyw gamau.
"Mae'r ffi cofrestru o £150 y côr yn parhau, beth bynnag ei faint. Boed â 10 o gantorion neu 100, does dim tâl ychwanegol."

Fe fydd Gŵyl Gwlad y Gân yn cael ei chynnal yn Stadiwm Principality, Caerdydd rhwng 6 a 9 Mai 2027
Un o nodau'r ŵyl ydw ailgreu cyngherddau Côr y Byd gafodd eu cynnal ar Barc yr Arfau yn 1992 a 1993.
Dywedodd Ben Lewis bod y digwyddiad "yn golygu gymaint i mi yn bersonol" gan mai ei dad, David Lewis, oedd yn gyfrifol am drefnu'r cyngherddau hynny.
"Mae dod â'r Côr World Choir yn ôl i Gaerdydd dros dri degawd yn ddiweddarach yn anrhydeddu'r etifeddiaeth yna ac yn dathlu treftadaeth gorawl rhyfeddol ar raddfa deilwng."
Gan annog corau i fod yn rhan o'r digwyddiad, ychwanegodd: "Diolch i bawb a wnaeth ein herio, ein holi a rhannu eu safbwyntiau.
"Fe fydd Côr World Choir 2027 yn well o'r herwydd."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.