Cyfyngiadau newydd oherwydd bygythiad ffliw adar

IeirFfynhonnell y llun, Getty Images
GanSteffan Messenger
Gohebydd Amgylchedd
  • Cyhoeddwyd

Bydd busnesau ac unigolion sy'n cadw dofednod ac adar caeth yn gorfod dilyn mesurau bioddiogelwch llymach wrth i Lywodraeth Cymru gyhoeddi cyfyngiadau i atal lledaeniad ffliw adar.

Daw'r gorchymyn wedi i Loegr a'r Alban fynnu bod adar yno yn cael eu cadw dan do am y tro yn gynharach yn yr wythnos.

Dyw Cymru ddim wedi cofnodi achos o'r clefyd hynod heintus eto yn 2026, ond mae nifer yr achosion dros y ffin wedi bod ar gynnydd ers rhai dyddiau.

O dan y cyfyngiadau newydd, o ddydd Llun 16 Tachwedd bydd yn rhaid i fusnesau ac unigolion gyflwyno mesurau i gadw'u hadar ar wahan o adar gwyllt, a chymryd gofal ychwanegol wrth lanhau a diheintio.

Os oes amheuaeth ynglŷn ag achos posib o'r clefyd, mae'n rhaid rhoi gwybod ar unwaith i'r Asiantaeth Iechyd Anifeiliaid a Phlanhigion (APHA).

Mae'r feirws yn effeithio ar adar, ac weithiau anifeiliaid eraill fel llwynogod, morloi a dyfrgwn.

Yn ôl gwyddonwyr, mae'r risg i bobl yn isel iawn, ac mae achosion o'r feirws yn cael eu trosglwyddo o adar i bobl yn brin.

Mae ffermydd a busnesau dofednod wedi wynebu cyfyngiadau yn rheolaidd ers 2014, pan ddaeth mathau newydd a dinistriol o'r feirws i'r amlwg gan ledu'n fyd-eang.

Dyma'r ail flwyddyn yn olynol i fusnesau yng Nghymru wynebu cyfyngiadau, ar ôl i ddegau o filoedd o ieir a thyrcwn gael eu difa yn 2025 wedi cyfres o achosion yn y canolbarth, y gorllewin a'r gogledd.

Daw'r cyhoeddiad ar adeg pan y mae llawer o fusnesau yn paratoi ar gyfer cyfnod prysur hyd at y Nadolig.

Dywedodd Llywodraeth y DU ddydd Mawrth nad oedd yn rhagweld effaith ar argaeledd tyrcwn na chynnyrch tymhorol eraill i'r cyhoedd.

Mae Asiantaeth Diogelwch Iechyd y DU (UKHSA) wedi dweud bod y risg i'r cyhoedd yn "isel iawn", tra bod yr Asiantaeth Safonau Bwyd (FSA) wedi nodi bod ffliw adar yn peri risg isel iawn i ddiogelwch bwyd, a bod dofednod ac wyau sydd wedi'u coginio'n gywir yn ddiogel i'w bwyta.

'Parhau i fonitro'r sefyllfa'

Wrth gyhoeddi'r mesurau yng Nghymru dywedodd y Gweinidog Cabinet dros Wydnwch Gwledig a Chynaliadwyedd, Llyr Gruffydd AS, ei fod yn credu bod y cyfyngiadau yn "gymesur â'r lefel risg" ar hyn o bryd.

"Nid oes digon o dystiolaeth ar hyn o bryd i'w gwneud yn orfodol i gadw heidiau dan do nac i adolygu'r trefniadau ar gyfer crynoadau adar, ond bydd y sefyllfa yn parhau i gael ei monitro'n agos," meddai.

"Mae'r risg i iechyd dynol o ffliw adar yn parhau yn isel iawn ac mae dofednod ac unrhyw gynhyrchion dofednod wedi'u coginio'n iawn, gan gynnwys wyau, yn dal yn ddiogel i'w bwyta.

"Mae gan bob un ohonom gyfrifoldeb i ddiogelu iechyd a lles ein haid genedlaethol yng Nghymru ac atal clefydau rhag cael eu cyflwyno a'u lledaenu."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.