Gwobrwyo Mentrau Iaith Cymru am brosiectau 'arloesol a chynhwysol'

Enillwyr Gwobrau Mentrau Iaith 2026
- Cyhoeddwyd
Mae prosiectau o Fôn a Sir Benfro ymhlith y rhai a ddaeth i'r brig yn seremoni wobrwyo Mentrau Iaith Cymru eleni.
Cafodd y digwyddiad, sy'n dathlu ymdrechion y 22 o fentrau iaith i hyrwyddo a chynyddu defnydd o'r Gymraeg, ei gynnal ym Mharc y Scarlets, Llanelli nos Iau.
Y pum Menter Iaith wnaeth ennill prosiect o ragoriaeth yn 2026 oedd Abertawe, Conwy, Dinefwr, Môn a Sir Benfro.
Dywedodd Garmon Rhys, Cyfarwyddwr BBC Cymru, oedd ar y panel beirniadu, fod gweld yr holl waith sy'n digwydd mewn cymunedau wedi bod yn "ysbrydoledig".

Fe enillodd Menter Môn wobr rhagoriaeth gyda'u prosiect 'Ogi Ogi'
Roedd y beirniad yn chwilio am brosiectau oedd "yn cael effaith gadarnhaol ar ddefnydd ac agweddau at y Gymraeg, yn apelgar, yn arloesol ac yn gynhwysol".
"Er y gallem fod wedi gwobrwyo pob un o'r prosiectau, roeddem fel panel yn gytûn fod y pum prosiect o ragoriaeth ddaeth i'r brig yn haeddu clod arbennig," ychwanegodd Garmon Rhys.
Cafodd Menter Môn eu gwobrwyo am brosiect Ogi Ogi - sy'n cael ei ddisgrifio fel "siop-un-stop i annog a chefnogi rhieni newydd i ddefnyddio'r Gymraeg gyda'u plant".
Yn ôl y beirniaid, mae'n "syniad gwych i wreiddio'r Gymraeg mewn bywydau bach o'r cychwyn cyntaf".

Daeth Menter Dinefwr i'r brig gyda phrosiect 'Helo Hanes'
Cipiodd Menter Abertawe wobr am eu prosiect i sefydlu côr cymunedol fel rhan o Ŵyl Tawe.
Y bwriad oedd ymgysylltu gyda chymunedau gwahanol sy'n byw yn Abertawe a'u cyflwyno i'r Gymraeg.
Daeth prosiect Helo Hanes Menter Dinefwr i'r brig am lwyddo i "ddod â hanes yn fyw yn yr ardal".
"Roedd yn wych gweld sut oedd treftadaeth yr ardal yn cael ei ddefnyddio fel arf i gysylltu cymunedau ac unigolion gyda'u milltir sgwâr, a'r iaith," meddai'r beirniaid.

Enillodd Menter Conwy am eu gwaith wrth sefydlu 12 o bwyllgorau sy'n trefnu digwyddiadau lleol
Cafodd Menter Conwy eu gwobrwyo am eu hymdrechion i sicrhau fod digwyddiadau a gweithgareddau'n cael eu cynnal ar draws y sir.
Maen nhw wedi sefydlu 12 pwyllgor lleol sy'n rhoi cyfrifoldeb i gymunedau drefnu digwyddiadau.
Yn ôl y beirniaid, roedd hon yn "enghraifft dda o ledaenu effaith y Fenter yn ogystal â gwreiddio'r gweithgareddau o fewn cymunedau ar draws y sir".
Ac fe enillodd Menter Sir Benfro am brosiect Glasu, oedd yn "enghraifft berffaith o sut y mae'r mentrau'n uchafu effaith digwyddiadau cenedlaethol megis yr Eisteddfod Genedlaethol".
Dywedodd y beirniaid ei fod yn "brosiect trawiadol a gweladwy iawn, oedd yn plethu hanes a diwylliant yr ardal mewn modd amrywiol, gyda'r murluniau'n goron ar y cyfan".
Ar y panel beirniadu eleni roedd Andrew White, Cyfarwyddwr Cronfa Treftadaeth y Loteri Genedlaethol yng Nghymru, Garmon Rhys, Cyfarwyddwr BBC Cymru, Llinos Roberts, Cyfarwyddwr Datblygu'r Gymraeg Coleg Cambria, Dafydd Rhys, Prif Weithredwr Cyngor Celfyddydau Cymru ac Elin Burns, Cyfarwyddwr y Gymraeg Llywodraeth Cymru.
Yr enillwyr yn llawn:
Menter Môn - gyda'u prosiect Ogi Ogi
Menter Iaith Abertawe - gyda Chôr Cymunedol Gŵyl Tawe
Menter Dinefwr – gyda'u prosiect Helo Hanes
Menter Iaith Conwy – gyda'u Pwyllgorau Ardal
Menter Iaith Sir Benfro – gyda'u Prosiect Glasu
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol .
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Cyhoeddwyd1 diwrnod yn ôl

- Cyhoeddwyd10 Tachwedd

