Dwy radd o Oxbridge – a dal dim swydd

Alis FrancisFfynhonnell y llun, Llun cyfrannydd
Disgrifiad o’r llun,

Alis Francis, sydd wedi gwneud dwy radd yng Nghaergrawnt

  • Cyhoeddwyd

Mae dynes o Gaernarfon wedi sôn pa mor anodd ydy cael swydd er bod ganddi ddwy radd o Brifysgol Caergrawnt.

Mae Alis Francis wedi ceisio am nifer o swyddi heb lwc ac yn dweud mai anaml y mae'n cael cyfweliad hyd yn oed.

Dywedodd bod ei ffrindiau, sydd efo cymwysterau a phrofiad perthnasol, mewn sefyllfa debyg a bod yn rhaid gwneud rhwybeth i wella cyfleodd gyrfaol i bobl ifanc.

Ddydd Mawrth fe wnaeth y cyn-weinidog Llafur yn San Steffan, Alan Milburn, gyhoeddi ei adroddiad hirddisgwyliedig ar ddiweithdra ymhlith pobl ifanc.

'Cais ar gyfer gymaint o bethau'

Mae nifer cynyddol o bobl ifanc ym Mhrydain yn perthyn i'r categori NEET, sef allan o waith addysg neu hyfforddiant – gyda bron i 15% yng Nghymru.

Fe wnaeth Ms Francis ei gradd gyntaf mewn daearyddiaeth yng Nghaergrawnt cyn gwneud gradd meistr mewn astudiaethau amgylcheddol, hefyd yng Nghaergrawnt.

Ei gobaith ydi mynd i weithio yn y maes cadwraeth ac mae hi wedi ceisio am nifer o swyddi.

Dywedodd ar raglen Dros Frecwast ar BBC Radio Cymru: "Mae'n teimlo bach fatha numbers game ar y funud lle dwi jyst angen rhoi cais fewn ar gyfer gymaint o bethau a gobeithio bod rhywbeth yn sticio, yn hytrach na gallu meddwl yn iawn beth dwi eisiau wneud, lle dwi eisiau gyrfa fi fynd, pa fath o sgiliau dwi eisiau bod yn datblygu a beth dwi'n gweld i fi fy hun yn y dyfodol."

Anodd cael profiad

Dywedodd bod y sefyllfa'n anodd gan bod nifer o gyflogwyr yn chwilio am brofiad o weithio yn y maes – sy'n anodd iawn heb gael y swydd cyntaf ar ôl gadael y brifysgol.

Mae cael unrhyw swydd sy'n cyfateb â'i chymwysterau yn anoddach byth, meddai.

"Mae trio am rôl sydd wedi targedu fwy at graduates, sef upskilio nhw neu cael mentor a gweithio fel yna, maen nhw mor gystadleuol," meddai.

"Mae o'n anodd iawn hyd yn oed cael trwy'r rhan o'r paper application.

"Ond wedyn os yda chi'n dechrau mynd yn uwch na hynna, does 'na neb eisio gwneud y training cywir.

"Maen nhw'n dweud bod gennych chi ddim y profiad, sydd digon teg, ond sut yda ni fod i gael y profiad yna?

"Mae gen i ffrindiau sydd efo work experience ac internships a bob dim, mae eu CV nhw wedi'u padio allan yn rili neis a dal methu ffeindio dim byd neu methu hyd yn oed gael cyfweliad."

Adroddiad Milburn

Cafodd adroddiad 267 tudalen Milburn ei gyhoeddi fore Mawrth, gyda'r nod o helpu mwy o bobl ifanc sydd allan o waith addysg neu hyfforddiant (NEET) i mewn i waith.

Mae'n amcangyfrif y gallai'r argymhellion helpu tua 440,000 o bobl ifanc i gael gwaith cynaliadwy erbyn 2036, a gostwng cyfradd NEET y DU o 13% i 5% dros y degawd nesaf.

Ymhlith y prif argymhellion mae diwygio'r system budd-daliadau i bobl dan 25 oed, gan gynnwys newid y cymorth y gallant ei hawlio drwy Gredyd Cynhwysol a Thaliad Annibyniaeth Personol (PIP).

Mae hefyd yn argymell lleihau cyfraniadau Yswiriant Gwladol cyflogwyr sy'n recriwtio pobl ifanc rhwng 21 a 24 oed mewn manwerthu a lletygarwch, a dyblu nifer y bobl ifanc sy'n cwblhau prentisiaethau erbyn 2036.

Yn gynharach yn yr wythnos fe wnaeth BBC Cymru Fyw adrodd hanes nifer o bobl ifanc sy'n methu dod o hyd i waith, gan gynnwys Ffion Johns, o Lanelli, sydd wedi gwneud cais am 100 o swyddi ers mis Mehefin ond heb lwyddiant.

Dywedodd llefarydd ar ran Llywodraeth Cymru: "Rydym yn croesawu'r ffocws y mae Adolygiad Milburn wedi'i roi ar yr heriau cymhleth sy'n wynebu pobl ifanc wrth fynd i mewn i'r farchnad lafur.

"Fodd bynnag, adolygiad annibynnol yw hwn a gomisiynwyd gan Lywodraeth y DU, ac rydym yn disgwyl i'r rhan fwyaf o'r argymhellion gael eu cyfeirio at Lywodraeth y DU.

"Byddwn yn adolygu'r adroddiad ac yn ystyried ei arwyddocâd i Gymru.

"Rydym yn barod i weithio gyda Llywodraeth y DU i sicrhau bod Cymru'n elwa'n llawn o unrhyw fesurau ledled y DU sy'n gwella cyfleoedd bywyd drwy fynediad at waith gwerth chweil.

"Rydym wedi ymrwymo i ddull trawsadrannol o gefnogi pobl ifanc i mewn i gyflogaeth a hyfforddiant, ac mae'r gwaith hwnnw eisoes ar y gweill."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.