Dylan Lawlor: Sai hefo geiriau i ddisgrifio'r flwyddyn ddiwethaf

Mae amddiffynnwr canol Caerdydd a Chymru, Dylan Lawlor yn cyfaddef ei bod hi'n anodd iddo gredu'r hyn y mae wedi ei gyflawni yn ystod y flwyddyn ddiwethaf.

Mae'n 12 mis ers i'r chwaraewr 20 oed sefydlu ei hun yn nhîm cyntaf yr Adar Gleision ac ennill ei gap cyntaf dros y tîm cenedlaethol.

"Sai hefo'r geiriau i ddisgrifio beth sydd wedi digwydd," meddai Lawlor ym mhennod ddiweddaraf y podlediad, Y Coridor Ansicrwydd.

"Mae'n pinch me moment bob tro dwi'n meddwl nôl am y flwyddyn ddiwethaf.

"Mae wedi bod yn wych a dwi dal yn enjoio popeth a dyna'r peth mwyaf pwysig."

Mae Lawlor wedi dilyn ôl troed un arall o gyn-ddisgyblion Ysgol Cwm Rhymni yng Nghaerffili drwy chwarae i Gaerdydd a Chymru - Aaron Ramsey.

"Mae'n amlwg yn rywun oeddwn i yn gallu edrych lan i gyda'r ysgol ac yn dod o Gaerffili," meddai Lawlor.

"Odd o'n ysbrydoliaeth i fi yn tyfu lan ac yna ges i siawns i weithio gydag ef ac wedyn o dan fe pan oedd yn dechrau ei yrfa fel hyfforddwr.

"Oedd e'n wych ac mi oedd yn pasio pethau lawr i fi fel tips a pethau ro ni'n gallu ychwanegu i fy gêm.

"Pan mae'n dod gan rywun fel yna mae'n rhaid cymryd e."

Yn ystod cyfnod byr Ramsey fel rheolwr dros dro Caerdydd, fe roddodd gyfle i Lawlor chwarae mewn gêm gynghrair am y tro cyntaf ar ddiwedd tymor 2024-25.

Ac ei ymddangosiad yn erbyn Norwich oedd gêm olaf yr Adar Gleision yn y Bencampwriaeth cyn disgyn i Adran Un.

Mae Lawlor yn cydnabod y bu'n rhaid i'r clwb ailosod ac ymddiried mewn chwaraewyr ifanc fel ei hun.

Chwaraeodd 32 gwaith yn y gynghrair i dîm Brian Barry-Murphy y tymor diwethaf wrth iddynt sicrhau dyrchafiad yn ôl i'r Bencampwriaeth.

Dim ond unwaith y mae wedi chwarae yn y Bencampwriaeth y tymor hwn oherwydd anaf i'w ben-glin a ddioddefodd tra'n chwarae i Gymru ym mis Mehefin.

Doedd e ddim wedi gwella o'r anaf mewn pryd i fod yn rhan o gemau Cynghrair y Cenhedloedd oddi cartref ym Mhortiwgal a Denmarc na'r gemau cartref yn erbyn Norwy a Denmarc.

"Oedda nhw'n gemau anodd, roedden ni'n gwybod hynna pan ddaeth y draw allan," meddai Lawlor.

"Dwi'n credu fod pethau cadarnhaol a pethau 'da ni'n gallu adeiladu arno cyn mynd mewn i mis Tachwedd.

"Roedda ni'n gwybod y bydde nhw'n gemau anodd ond dyna beth 'da ni eisiau – i brofi ein hunain yn erbyn y timau gorau.

"I fod yn onest doeddwn i ddim yn y llun i fod yn rhan o'r camp.

"Dwi'n credu y peth pwysicaf i fi oedd jest meddwl am mis Tachwedd a trio bod yn ffit ar gyfer y gemau yn erbyn Portiwgal a Norwy."

Byddai bod yn ôl i chwarae yn erbyn gwledydd hynny yn rhoi cyfle iddo wynebu dau o gewri'r gêm fis nesaf.

Mae Lawlor yn cyfaddef yr oedd yn siomedig i golli allan ar wynebu Cristiano Ronaldo ac Erling Haaland yn y gemau diweddar.

"Croesi bysedd byddai'n gallu chwarae yn erbyn nhw ym mis Tachwedd a profi fy hun yn erbyn nhw," ychwanegodd.

Gwrandewch ar y cyfweliad llawn gyda Dylan Lawlor - Y Coridor Ansicrwydd