'Gofalwch gael yswiriant teithio digonol' - mam merch o Lanrug gafodd ei hanafu yn Nhwrci

Mae mam i ferch o Lanrug yng Ngwynedd gafodd ei gwasgu a'i chaethiwo gan fws wnaeth droi drosodd ar wyliau tramor cynta'r teulu, wedi annog pobl i sicrhau bod ganddyn nhw yswiriant teithio digonol.

Dywedodd Emma Williams bod ei merch 12 oed, Greta wedi cael toriad i'w phelfis a'r sacrwm ar waelod ei hasgwrn cefn yn y digwyddiad yn Alanya, Twrci fis Gorffennaf, ar ôl i'r bws golli rheolaeth a throi ar ei ochr tra'n ceisio pasio cerbyd arall.

Roedd y gofal meddygol a'r trefniadau teithio i ddod â Greta yn ôl adref yn dod o dan bolisi yswiriant teithio'r teulu, ac mae Greta yn wynebu chwe mis o wella'n llwyr o'i hanafiadau.

"Mae'n werth talu ychydig bach yn ychwanegol [am yswiriant], hyd yn oed os na ydach chi ei angen o," meddai Emma.

Roedd y teulu wedi mynd am bolisi yswirant uwch gan ei fod yn "rhoi tawelwch meddwl yn fwy nag unrhyw beth".

Roedd Emma Williams, ei phartner Len, a'u merched Greta ac Eiry-ana sy'n 8 oed, yn mwynhau gwyliau yng ngwesty Etfalia Ocean, ac wedi bod ar nifer o deithiau yn ystod eu harhosiad yno.

Ar 22 Gorffennaf, ar seithfed diwrnod eu gwyliau, fe aethon nhw i'r Green Canyon, lle gwnaethon nhw nofio, cyn mynd i ymweld â rhaeadr a sŵ.

Roedd y teulu yn teithio i'r rhaeadr ar fws gyda dau deulu Prydeinig arall, ond wrth i yrrwr y bws geisio pasio cerbyd arall, fe "gollodd reolaeth a llithro i lawr dibyn".

Dywedodd Emma Williams i'r bws "droi sawl gwaith, ac fe fuon ni bron â tharo coeden."

"Fe allen ni fod wedi disgyn pellter sylweddol," meddai.

Dywedodd bod ffenestri'r bws yn rhai di-wydr, a bod Greta wedi mynd hanner ffordd drwy'r ffenest cyn i'r bws ddisgyn ar ei ochr a glanio arni.

"Roedd hanner y bws ar ei phelfis a'i chluniau, ond ei choesau a'i chorff y tu mewn i'r bws," meddai.

"Roedd fy mhartner hefyd wedi mynd drwy'r ffenestr ac roedd eisiau achub fy merch ieuengaf, ac yn ei dal i fyny," meddai Emma.

"Fe ruthrodd pawb i geisio helpu Greta, a throi'r bws yn ôl i fyny.

"Dwi'n gwybod nad ydach chi i fod i wneud pethau fel yna, ond ymateb greddfol oedd troi'r bws yn ôl i'w ffordd gywir.

"Roedd yna blentyn 12 oed yn sownd oddi tano.

"Roedd fy merch 8 oed yn sgrechian ac yn meddwl bod Greta wedi marw, roedd hi'n panicio. Roedd yn gwbl erchyll."

Cafodd Greta ei rhyddhau o fewn pum munud, a chafodd ei chludo mewn ambiwlans i'r ysbyty, ynghyd â gyrrwr y bws.

Cafodd sgan CT a phelydr-X, a dywedodd Emma Williams bod y profiad yn "hynod o frawychus iddi hi".

"Roedd yn rhaid iddyn nhw dorri ei dillad i ffwrdd oddi arni, ac roedd yn rhaid iddi aros ar fwrdd pren am 24 awr heb allu symud o gwbl."

Mae'r BBC wedi gwneud cais am sylw gan y cwmni a drefnodd y daith fws, Tony Montana Excursions.

Ar ôl wyth diwrnod yn yr ysbyty, cafodd Greta ei chludo yn ôl i'r DU mewn ambiwlans awyr gyda'i mam i gael triniaeth bellach, gyda'r trefniadau yn dod o dan eu hyswiriant teithio, oedd wedi costio £106.

"Dywedodd y peilotiaid a'r meddygon bod yr hediad yn unig yn costio €50,000.

"Mae hynny'n frawychus, fe wnaeth yr yswiriant £106 dalu am hynna. Gall unrhyw beth ddigwydd."

Dywedodd Emma Williams bod cwmni Jet2, a werthodd y gwyliau iddyn nhw, wedi hepgor costau newid hediadau Len ac Eiry-ana yn ôl i'r DU.

Cafodd Greta ei chludo i Ysbyty Athrofaol y Faenor yng Nghwmbrân a chafodd ffisiotherapi yno, ac mi fydd yn cael gwybod ar 2 Medi os y gall hi ddychwelyd i'r ysgol.

"Chaiff hi ddim gwneud llawer ar hyn o bryd, dim cerdded llawer sy'n biti mawr," meddai Emma.

"Mae ei ffrindiau hi wedi bod yn wych."

"Roedd hi wedi cael braw mawr pan ddigwyddodd o. Y cyfan roedd hi eisiau oedd sicrwydd gen i.

"Fe wnaethon ni geisio cadw mor bositif â phosib o dan yr amgylchiadau.

"Roedd hi'n eithriadol o gryf - dwi mor browd o'r ffordd y gwnaeth hi ymdopi.

"Mae'n rhybwth sy'n mynd i fod gyda ni am byth," ychwanegodd.

"Mae'n mynd i gymryd amser hir i ddod drosto.

"Roedden ni'n ceisio llenwi'r gwyliau gyda chymaint o brofiadau ac atgofion â phosib, a'i wneud yn hwyl.

"Tydyn nhw fyth eisiau mynd ar wyliau eto.

"Rydan ni am geisio mynd â nhw i rywle, nid ar drip mae'n debyg, i geisio tawelu eu meddyliau.

"Damwain eithriadol oedd hi, a tydi pethau fel hyn ddim yn digwydd fel arfer."

Dywedodd Graeme Buck o Gymdeithas Asiantaethau Teithio Prydain bod yswiriant teithio yn un o'r pethau y mae'n "rhaid ei gael wrth deithio dramor".

"Er bod y rhan fwyaf o wyliau yn pasio heb unrhyw broblemau, gall damweiniau neu ddigwyddiadau annisgwyl godi, a gall y gost o driniaeth feddygol neu deithio adref fod yn sylweddol.

"Nid yr yswiriant rhataf ydi'r gorau bob amser, ac mae'n bwysig peidio dewis yswiriant yn seiliedig ar y gost yn unig.

"Dylid edrych ar yr hyn sy'n gynwysiedig yn y polisi a gwneud yn siŵr ei fod yn addas ar gyfer y gwyliau, gan gynnwys unrhyw weithgareddau neu chwaraeon gaeaf."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.