Y BBC yn penodi Rhuanedd Richards yn Gyfarwyddwr y Cenhedloedd

Fe ddechreuodd Rhuanedd Richards yn y swydd dros dro cyn cael ei phenodi'n barhaol
- Cyhoeddwyd
Mae'r BBC wedi cyhoeddi bod Rhuanedd Richards wedi cael ei phenodi'n Gyfarwyddwr y Cenhedloedd.
Roedd Ms Richards wedi bod yn gwasanaethu yn y swydd dros dro, ac mae hi bellach yn ymgymryd â'r rôl yn barhaol ar unwaith.
Bydd yn gyfrifol am weithrediadau'r BBC yng Nghymru, yr Alban a Gogledd Iwerddon, yn ogystal â gwasanaethau lleol y BBC yn Lloegr.
Bydd hi hefyd yn ymuno â Phwyllgor Gweithredol y BBC.
Dywedodd Cyfarwyddwr Cyffredinol y BBC, Matt Brittin, fod Ms Richards yn dod â phrofiad golygyddol sylweddol ac ymrwymiad cryf i sicrhau bod y BBC yn adlewyrchu bywydau, hunaniaethau a phrofiadau cynulleidfaoedd ledled y Deyrnas Unedig.
Ychwanegodd ei bod eisoes wedi goruchwylio cynnydd mewn buddsoddiad mewn cynnwys sy'n portreadu'r cenhedloedd a'r rhanbarthau, yn ogystal â thwf parhaus mewn cynulleidfaoedd ar-lein.
Dywedodd Rhuanedd Richards: "Rwy'n angerddol iawn am rôl y BBC wrth greu cynnwys gwych sy'n adlewyrchu ac yn gwasanaethu cynulleidfaoedd ar draws y cenhedloedd a'r rhanbarthau.
"Mae diwylliannau, ieithoedd a hunaniaethau'r Alban, Cymru a Gogledd Iwerddon, ynghyd â'r cymunedau unigryw ledled Lloegr, yn rhan hanfodol o bwy ydym ni a'r hyn rydyn ni'n ei wneud.
"Mae ein newyddiaduraeth a'n hadrodd straeon wedi eu gwreiddio yn y cymunedau rydyn ni'n eu gwasanaethu, ac rwy'n hynod falch o'r gwaith hwnnw ac o'r timau talentog sy'n ei gyflawni bob dydd."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.