Vitor Matos yn gadael Abertawe i ddod yn rheolwr ar Strasbourg

Roedd Matos wedi arwyddo cytundeb gydag Abertawe tan 2030
- Cyhoeddwyd
Daeth cadarnhad fod prif hyfforddwr Abertawe, Vitor Matos wedi gadael ei swydd wedi llai na blwyddyn gyda'r clwb.
Mae Matos, 38 oed, wedi cael ei benodi yn rheolwr ar glwb Strasbourg - sy'n chwarae ym mhrif adran Ffrainc.
Y gred yw bod Strasbourg, sydd â'r un perchnogion â Chelsea, yn barod i dalu tua £5m o iawndal am Matos - oedd â chytundeb gyda'r Elyrch tan 2030.
Mae rhai aelodau o'r tîm hyfforddi - Diogo Medeiros, Toze Mendes, Goncalo Ricca a Pedro Pereira - wedi gadael y clwb hefyd.
Y gred yw y bydd cyn-gapten Cymru, Ashley Williams yn cymryd yr awenau dros dro ar y cyd â chyn-chwaraewyr yr Elyrch Kristian O'Leary a Leon Britton.

Mae Ashley Williams wedi bod yn rhan o dîm hyfforddi Cymru ers mis Medi
Cafodd Matos - sy'n dod o Bortiwgal - ei benodi yn brif hyfforddwr Abertawe ym mis Tachwedd y llynedd pan roedd yr Elyrch yn yr 20fed safle yn y Bencampwriaeth.
Bryd hynny doedd o ond wedi bod yn rheolwr ers rai misoedd - a hynny gyda Maritimo yn ail haen Portiwgal.
Cyn hynny roedd yn gweithio i Lerpwl am bum mlynedd fel rhan o dîm hyfforddi Jurgen Klopp.
Ar ôl gorffen y tymor diwethaf yn hanner uchaf y tabl, mae Abertawe wedi bod yn brwydro tua brig y tabl y tymor hwn.
Fe fydd Abertawe yn croesawu West Brom i'r Swansea.Com y penwythnos hwn cyn iddyn nhw wynebu Middlesbrough oddi cartref nos Fawrth.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol .
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Cyhoeddwyd24 Tachwedd 2025

- Cyhoeddwyd25 Mehefin

- Cyhoeddwyd29 Hydref
