Plaid Werdd Cymru am ddewis arweinydd newydd i ddisodli Anthony Slaughter

Yn ôl Zack Polanski, mae Anthony Slaughter wedi bod yn "llais enfawr dros Gymru"
- Cyhoeddwyd
Bydd aelodau Plaid Werdd Cymru yn pleidleisio yn ddiweddarach eleni i ddewis olynydd i Anthony Slaughter fel arweinydd y blaid.
Mae Mr Slaughter wedi bod yn arwain y blaid ers 2018, ond mae rheolau'r blaid yn golygu bod yn rhaid iddo gamu o'r swydd ar ôl cwblhau tri thymor.
Gyda Paul Rock, yr Aelod o'r Senedd (AS) arall sydd gan y blaid, wedi cadarnhau na fydd yn sefyll, mae'n golygu y bydd yr arweinydd newydd yn dod o'r tu allan i'r Senedd.
Mae'r Cynghorydd Ian Chandler, o Sir Fynwy, wedi cyhoeddi ei fod e'n bwriadu mynd amdani gan ddweud ei fod am helpu i ddatblygu'r blaid yng Nghymru yn "rym etholiadol go iawn".
Mae disgwyl i'r bleidlais gael ei chynnal yn ddiweddarach yn y mis ac i mewn i ddechrau mis Rhagfyr.

Daeth Anthony Slaughter yn arweinydd Plaid Werdd Cymru yn 2018
Daeth Anthony Slaughter yn arweinydd Plaid Werdd Cymru yn 2018. O dan ei arweiniad, enillodd y blaid ei Haelodau Seneddol cyntaf erioed yn etholiad y Senedd y llynedd.
Wrth ymateb i'r newyddion, disgrifiodd arweinydd Plaid Werdd Cymru a Lloegr, Zack Polanski, Mr Slaughter fel "llais enfawr dros Gymru" sydd wedi ymrwymo'n gryf i gyfiawnder amgylcheddol a chymdeithasol.
Pwy yw Ian Chandler?
Mae'r Cynghorydd Ian Chandler yn cynrychioli ward Trefynwy ar Gyngor Sir Fynwy.
Mae'n rhan o glymblaid gyda'r Blaid Lafur ar Gyngor Sir Fynwy, lle mae'n aelod cabinet dros ofal cymdeithasol a diogelu.
Wrth siarad â BBC Cymru, dywedodd ei fod am weld Plaid Werdd Cymru yn datblygu'n blaid gryfach o fewn gwleidyddiaeth Cymru.
"Rwyf am helpu i adeiladu Plaid Werdd Cymru yn blaid sy'n rym etholiadol go iawn," meddai.
"Rwyf am fynd â ni i'r lefel nesaf oherwydd rwy'n credu y dylem fod yn rym llawer cryfach a blaenllaw yng ngwleidyddiaeth Cymru, sy'n ceisio gosod yr agenda."
Ychwanegodd fod galw gwirioneddol am weledigaeth werdd y blaid i fynd i'r afael â'r argyfwng hinsawdd a natur, yn ogystal â'r argyfwng costau byw yng Nghymru.

Mae Ian Chandler wedi datgan ei fwriad i olynu Anthony Slaughter fel arweinydd Plaid Werdd Cymru
Bydd cynhadledd Plaid Werdd Cymru yn cael ei chynnal ym Mangor yn ddiweddarach y mis hwn, gyda dyfodol y blaid yn debygol o fod yn un o'r prif bynciau trafod.
Yn ogystal â dewis arweinydd newydd, bydd aelodau'n trafod cynnig a allai arwain at weld Plaid Werdd Cymru yn dod yn blaid annibynnol erbyn 2034.
Dywedodd Ian Chandler ei fod yn credu bod hynny'n debygol o ddigwydd yn y pen draw.
"Dw i'n meddwl mai'r unig gwestiwn yw pryd a sut fydd hynny'n digwydd? Fydd hi ddim yn broses sydyn," meddai.
Er iddo ddisgrifio'r amserlen sydd yn y cynnig fel un "ofalus", dywedodd y byddai'n croesawu gweld y broses yn symud yn gynt pe bai hynny'n bosibl.
Ychwanegodd ei fod yn gobeithio y gallai Plaid Werdd Cymru sefydlu ei hun fel plaid annibynnol cyn etholiad nesaf y Senedd yn 2030.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Cyhoeddwyd24 Medi


