Cynghrair y Cenhedloedd: Cymru i herio Slofenia yn y gemau ail gyfle

Ben DaviesFfynhonnell y llun, Getty Images
Disgrifiad o’r llun,

Fe gollodd Cymru bump o'u chwe gêm yng Nghynghrair y Cenhedloedd y tymor hwn

GanIfan Ywain
BBC Cymru Fyw
  • Cyhoeddwyd

Fe fydd Cymru yn wynebu Slofenia yn y gemau ail gyfle i geisio sicrhau eu bod yn aros ym mhrif haen Cynghrair y Cenhedloedd.

Gan fod Cymru wedi gorffen ar waelod grŵp A4 - oedd yn cynnwys Portiwgal, Denmarc a Norwy - bydd rhaid trechu Slofenia dros ddau gymal neu wynebu disgyn i'r ail haen.

Fe orffennodd Slofenia yn ail yng ngrŵp B1 - oedd yn cynnwys Y Swistir, Yr Alban a Gogledd Macedonia.

Fel y tîm yn haen A, fe fydd gan Gymru'r fantais o chwarae'r ail gymal yng Nghaerdydd.

Benjamin SeskoFfynhonnell y llun, Getty Images
Disgrifiad o’r llun,

Mae ymosodwr Manchester United, Benjamin Sesko yn un o chwaraewyr amlycaf Slofenia

Fe gollodd Cymru bump o'u chwe gêm yn ystod yr ymgyrch yng Nghynghrair y Cenhedloedd - gyda'r unig fuddugoliaeth yn dod gartref yn erbyn Norwy.

Ond roedd sawl perfformiad calonogol, gan gynnwys yn y golled i Bortiwgal nos Fawrth, ac mae Craig Bellamy yn mynnu fod y garfan wedi magu mwy o hyder yn ei hunain o ganlyniad.

"Rydyn ni'n fwy nag agos at y lefel yma, ry'n ni'n amlwg yn gallu cystadlu gyda'r timau yma," meddai.

"Rydyn ni eisiau, ac yn disgwyl bod yma. Roedd cyrraedd haen A yn bwysig i ni, ond mae aros yno yn ein galluogi i barhau i ddatblygu."

Ychwanegodd na fyddai ef yno i arwain y tîm drwy'r ymgyrch nesaf yng Nghynghrair y Cenhedloedd.

"Fydda i ddim yn rheolwr bryd hynny, felly dwi'n neud hyn i'r person nesaf, ond dwi hefyd yn ei wneud o i'r chwaraewyr."

Mae gan Craig Bellamy gytundeb gyda Chymdeithas Bêl-droed Cymru sy'n para tan 2028.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol .

Lawrlwythwch yr ap am y diweddaraf o Gymru ar eich dyfais symudol.