ይህ ዝቅተኛ ዳታን በመጠቀም ጽሑፍ ብቻ የሚቀርብበት የቢቢሲ አማርኛ ድረ ገጽ ነው
አሜሪካ በጊኒ ቢሳው ጨቅላዎች ላይ ልታደርግ የነበረው አወዛጋቢው የክትባት ሙከራ ለምን ተሰረዘ?
በጊኒ ቢሳው በጨቅላዎች ላይ የሄፒታይተስ ቢ ክትባት ሙከራ ለማድረግ የተያዘው ዕቅድ "ከሙያዊ ሥነ ምግባር ያፈነገጠ" እና "አዲስ የቅኝ ግዛት ሥርዓት ቅጥያ" በሚል ተወግዟል።
አሜሪካ በገንዘብ የምትደግፈው የክትባት ሙከራ እንዲሰረዝ ተወስኗል። የአገሪቱ የጤና ሚኒስትር ሮበርት ኤፍ ኬኔዲ ጁንየር የክትባት ውጤታማነት ላይ ጥያቄ በማንሳት ይታወቃሉ።
ውዝግቡን ተከትሎ ፖሊስ ምርምር ከሚደረግበት ማዕከል ክትባቶቹን ወስዷል።
ሙከራው የሚደረግባቸው ጨቅላ ሕጻናት ለምርምሩ ሲባል የዓለም ጤና ድርጅት ፈቃድ የሰጠውን ክትባት መውሰድ እንዲያቆሙ መደረጉ ዓለም አቀፍ ውግዘት አስከትሏል።
በሌሎች የዓለም ክፍሎች ካሉ ሕዝቦች በተለየ ሁኔታ አፍሪካውያን ለአደጋ በሚያጋልጡ ሙከራዎች ተሳታፊ የመደረጋቸው ነገር ከጤና ባለሙያዎች ጥያቄ አስነስቷል።
ቢቢሲ ከአሜሪካ የጤና ሚኒስቴር አስተያየት ጠይቋል።
ሙከራው ምንድን ነው?
ሙከራው ሊካሄድ ታቅዶ የነበረው በጊኒ ቢሳው ከአውሮፓውያኑ 1978 ጀምሮ አገልግሎት ይሰጥ በነበረው 'ባንዲም ኸልዝ ፕሮጀክት' የምርምር ማዕከል ውስጥ ነው።
14,000 ጨቅላዎች በምርምሩ እንደሚካተቱ ተገልጾም ነበር።
ከጨቅላዎቹ ገሚሱ እንደተወለዱ የሄፒታይተስ ቢ ክትባት ይሰጣቸዋል። የተቀሩት ደግሞ ክትባቱን አይወስዱም።
የምርምር ማዕከሉ እንዳለው የሙከራው ዓላማ ጨቅላዎች ክትባቱን መውሰዳቸው በበሽታው ያለመያዝ ዕድልን ያሰፋ እንደሆነ ለማወቅ ነው።
ከዚህ በፊት በጋምቢያ እና ጊኒ ቢሳው የተደረጉ ሙከራዎች የኅልፈት መጠን ከፍ ሊል እንደሚችል ጠቁመዋል።
የዓለም ጤና ድርጅት የሄፒታይተስ ቢ ክትባት ለጨቅላዎች እንዲሰጥ ቢመክርም በጊኒ ቢሳው ክትባቱ አይሰጥም።
ተመራማሪዎቹ እንደሚሉት ክትባቱ በማይሰጥበት አገር ምርምሩን ማድረግ ውጤታማነቱን ለመፈተሽ ያግዛቸዋል።
ክትባቱ ሙከራ ከተደረገበት በኋላ በአውሮፓውያኑ 2028 ጥቅም ላይ መዋል እንደሚጀምር ተገልጿል።
ሆኖም ግን በጥናቱ ከሚካተቱት ጨቅላ ሕጻናት መካከል ግማሹ ክትባቱን እንዳይወስዱ በማድረግ ምርምር ማከናወን ትችት አስከትሏል።
ከዓለም ድሃ አገራት አንዷ በሆነችው ጊኒ ቢሳው በሽታው በከፍተኛ መጠን ይሰራጫል።
የዶናልድ ትራምፕ አስተዳደር በ2025 ለሙከራው የሚውል 1.6 ሚሊዮን ዶላር ለሳውዘርን ዴንማርክ ዩኒቨርስቲ ሰጥቷል።
የዓለም ጤና ድርጅት ምን አለ?
የዓለም ጤና ድርጅት የጊኒ ቢሳው ተወካይ ዋልተር ካዛዲ ለቢቢሲ እንደተናገሩት፤ ጥያቄ ማንሳት የጀመሩት ምርምሩ እና ውጤቱ መርሕ የተከለተ አለመሆኑን ሲያስተውሉ ነው።
ጨቅላዎችን ከሄፒታይተስ ቢ የሚታደግ እና ፈቃድ የተሰጠው ክትባት እያለ ለምርምር ሲባል ብቻ ለሕጻናቱ አለመስጠት ከሙያ ሥነ ምግባር ውጭ መሆኑን ይናገራሉ።
"ክትባቱ ከ30 ዓመታት በላይ በ115 አገራት ሲሰጥ ነበር። ጨቅላዎች ክትባቱን እንዳይወስዱ መከልከል ሙያዊ ሥነ ምግባርን ይጣረሳል።"
የጨቅላዎቹ እናቶች ለበሽታው ተጋላጭ ከሆኑ ሕጻናቱም ዕድሜያቸው ሲጨምር በሕመሙ የመያዝ ዕድል ይኖራቸዋል።
ከጊኒ ቢሳው ሕዝቦች አንድ አምስተኛው ሄፒታይተስ ቢ አለባቸው። ሄፒታይተስ ቢ ጉበትን የሚያጠቃ የቫይረስ ኢንፌክሽን ነው።
በሕጻንነታቸው ለበሽታው የሚጋለጡ ሰዎች በከፍተኛ ደረጃ ይታመማሉ።
ጉበት ሥራ እንዲያቆም ስለሚያደርግ እና ለጉበት ካንሰርም ስለሚያጋልጥ ከሕሙማን ውስጥ 25% የሚሆኑትን ይገድላል።
የዓለም ጤና ድርጅት ከመንግሥት ጋር በመሆን ለጨቅላዎች ክትባቱ እንዲሰጥ ንቅናቄ እያደረገ ነው።
"በ2028 ጊኒ ቢሳው ክትባቱን መደበኛ ክትባቶች ዝርዝር ውስጥ እንደምታስገባው ይጠበቃል። በሚቀጥለው ዓመትም ሊጀመር ይችላል" ሲሉ የድርጅቱ የጊኒ ቢሳው ተወካይ ተናግረዋል።
አሁን ላይ በጊኒ ቢሳው የሄፒታይተስ ቢ ክትባት የሚሰጠው ልጆች በተወለዱ በስድስት ሳምንታቸው ነው። ይህም የክትባቱን ውጤታማነት ይቀንሰዋል።
ጊኒ ቢሳው ለምን ክትባቱን ተቃወመች?
ጊኒ ቢሳው በጨቅላዎች ላይ የሚደረግ የሄፒታይተስ ቢ ክትባትን ያገደችው ያለፈው ታኅሣሥ ላይ ነበር።
የአፍሪካ የበሽታ ቁጥጥር (ሲዲሲ) ምርምሩን እንዲፈትሽም ጥያቄ ቀርቧል።
ሙከራው ሊካሄድ ይችላል የሚል ጭምጭምታ ከተሰማ በኋላ የአገሪቱ የጤና ሚኒስትር ኩንሂን ናንቶቴ አስተባብለዋል።
"በመገናኛ ብዙኃን ሙከራው ይካሄዳል የሚል ነገር ስንሰማ ገርሞናል። በጣም አስቆጥቶናል። እኔ ዘርፉን የምመራው ሚኒስትር ራሱ አላውቅም" ብለዋል።
ሙከራው የሥነ ምግባር ፍተሻ ከተደረገበት በኋላ በጊኒ ቢሳው ፈቃድ ተሰጥቶታል የሚለው ሐሰተኛ መሆኑን ገልጸዋል።
የኅብረተሰብ ጤና ባለሙያ እና የዓለም አቀፍ ጤና አገልግሎት መምህር ዶ/ር ጋቪን ያሚ፤ ሙከራው እንዲደረግ የቀረበውን ሐሳብ ነቅፈዋል።
"ምርምሩ ለምን በዴንማርክ አልተካሄደም የሚለውን ስናይ መልሱ አዲስ የቅኝ ግዛት ሥርዓት ቅጥያ (ኒዮኮሎኒያሊዝም) ነው" ይላሉ።
ሄፒታይተስ ቢ በስፋት በሚሰራጭበት አገር ክትባቱን ለጨቅላዎች አለመስጠትን ያወግዛሉ።
ለሙከራው ፈቃድ የሰጠ አለ?
ሳውዘርን ዴንማርክ ዩኒቨርስቲ ምርምር ሲያካሂድ የሥነ ምግባር ጥሰት እንደሌለ ይገልጻል።
ዩኒቨርስቲው ተጨማሪ ፍተሻ እንዲደረግ መጠየቁን ያስታወቀ ሲሆን በዴንማር ሕግ ይህም ላያስፈልግ ይችላል።
የዴንማርክ ምርምር ተቋማት ፍተሻውን ማድረግ እንደማይችሉ ተገልጿል። ሆኖም ግን ዩኒቨርስቲው በራሱ የምርምር ማዕከል ፈቃድ ሲያገኝ ሙከራውን ለማድረግ ተወስኗል።
ይሄ ግን ጊኒ ቢሳው በገለልተኛ አካል ከምታደርው ፍተሻ ጋር የሚገናኝ አይደለም።
ክትባቶቹ ምን ሆኑ?
በአውሮፓውያኑ ጥቅምት 19 የጊኒ ቢሳው ፖሊስ ባንዲም የምርምር ተቋምን ፈትሿል።
የሄፒታይተስ ቢ ክትባቶችን በቁጥጥር ሥርም አውሏል።
ምን ያህል ክትባቶች እንደተገኙ ይፋ ባያደርግም ለጨቅላዎች ሊሰጡ እንደነበር ይፋ አድርጓል። በጉዳዩ ላይ ምርመራ ለማድረግ ምን እንዳነሳሳው በግልጽ አላስታወቀም።
ክትባቶቹ መያዛቸው "ችግር ያለባቸው ወይም ደኅንነታቸው ያልተጠበቀ" መሆኑን አያሳይም ብሏል።
ፖሊስ ምርመራ የጀመረው ከሙከራው ጋር በተያያዘ ወይም ክትባቶቹ ወደ ጊኒ ቢሳው ከመግባታቸው ጋር በተያያዘ መሆኑን አልያም ሌላ ምክንያት እንዳለው አላስታወቀም።
ፖሊስ ምርመራ የጀመረው ከሙከራው ጋር በተያያዘ ወይም ክትባቶቹ ወደ ጊኒ ቢሳው ከመግባታቸው ጋር በተያያዘ መሆኑን አልያም ሌላ ምክንያት እንዳለው አላስታወቀም።
ምርምሩን በገንዘብ የሚደግፈው ማን ነው?
ሙከራውን በገንዘብ የሚደግፈው የአሜሪካ መንግሥት ነው።
በትራምፕ የተሾሙት የአገሪቱ የጤና ሚኒስትር ሮበርት ኤፍ ኬኔዲ ጁንየር ለዚህ ኃላፊነቱን ይወስዳሉ።
በአሜሪካ ለረዥም ጊዜ በነበረው አሠራር ለጨቅላዎች የሄፒታይተስ ቢ ክትባት ይሰጥ ነበር። በኬኔዲ አመራር ሥር ይሄንን ለማስቆም ቢሞከርም በፍርድ ቤት ታግዷል።
በትራምፕ አስተዳደር ሥር ክትባቶችን በተመለከ ለውጦች እየተደረጉ ነው።
ምርምሩ ክትባትን በተመለከተ የፖሊሲ ለውጥ ያመጣ እንደሆነ ግልጽ አይደለም።
ሙከራው ሊደረግ ታስቦ የነበረው ክትባቱ በሽታውን በመከላከል ያለውን ሚና ለማወቅ ነው።
ኬኔዲ የዴንማርክ ተመራማሪዎችን "የክትባት ምርምር አማልክት" ሲሉ አሞግሰዋል።
የመጀመሪያ ደረጃ የምርምር ውጤታቸው ከክትባት ደኅንነት ጋር በተያያዘ ያለውን ስጋት የሚደግፉ መሆናቸውን ተናግረዋል።
ሆኖም ግን በቀጣይ የተሠራ ጥናት በቀደመው ምርምር የተገኘውን ውጤት ውድቅ አድርጓል።
ክትባቱ ላይ የሚደረገው ምርምር ከአሜሪካ የፖሊሲ ለውጥ ጋር የሚያያዝ መሆኑን የሚያሳይ መረጃ የለም።