ይህ ዝቅተኛ ዳታን በመጠቀም ጽሑፍ ብቻ የሚቀርብበት የቢቢሲ አማርኛ ድረ ገጽ ነው
የኤአይ የመረጃ ማዕከሎችን በመቃወም በሺህዎች የሚቆጠሩ ሰዎች ሰላማዊ ሰልፍ አካሄዱ
በስኮትላንድ በሺህዎች የሚቆጠሩ ሰዎች የሰው ሠራሽ አስተውሎት (ኤአይ) የመረጃ ማዕከሎችን ግንባታ በመቃወም አደባባይ ወጥተዋል።
የተለያዩ መፈክሮች የያዙት ተቃዋሚዎች ወደ ስኮትላንድ ፓርላማ ተጉዘውም ድምጻቸውን አሰምተዋል።
የሰው ሠራሽ አስተውሎት የመረጃ (ዳታ) ማዕከሎች በአካባቢ ላይ የሚያደርሱት ጫና ዋነኛ መነጋገሪያ ሆኗል። በመላው አውሮፓ የእነዚህን ማዕከላት ግንባታ በመቃወም ሰላማዊ ሰልፎች እየተካሄዱም ነው።
የስኮትላንድ መንግሥት ለማዕከላቱ ግንባታ የሚውል መመሪያን በተመለከተ ያወጣውን ዕቅድ ይፋ እንደሚያደርግ ይጠበቃል።
ዕቅዱ "የሕዝብን ተጠቃሚነት" የሚያሳድግ መሆኑ ተገልጿል።
የስኮትላንድ የኢኖቬሽን ሚኒስትር አልያን ስሚዝ እንደተናገሩት የመረጃ ማዕከላት "የኤአይ ተቀጥላ" ናቸው።
ተቃዋሚዎቹ በበኩላቸው የዳታ ማዕከላት "ለሰው ልጆች አደጋ ደቅነዋል" ሲሉ ገልጸዋል።
"ምድራችንን ዋጋ እያስከፈሏት ነው" በማለትም የዳታ ማዕከላት በአካባቢ ደኅንነት ላይ የጋረጡትን አደጋ ገልጸዋል።
የዳታ ማዕከሎችን የሚቃወም ንቅናቄ አባል ኪም ካይርንስ እንደተናገችው፤ የዳታ ማዕከሎች የሚያወጡት ድምጽ እንዲሁም በግንባታ ወቅት የሚፈጥሩት የመንገድ መዘጋት እና ተያያዥ ችግሮች ማኅበረሰቡን ይፈትናሉ።
"የሁሉንም ሰዎች ሕይወት የሚያሳድግ አይደለም። ማዕከላቱ ግዙፍ ስለሆኑ ከፍተኛ የኤሌክትሪክ ኃይል ያስፈልጋቸዋል። ማዕከላቱ የሚወስዱት በሬ እና በግ የሚኖርበት አረንጓዴ ስፍራ ለአካባቢው እንደ ገዳም ነው። ማዕከላቱ የአየር ብክለት፣ የብርሃን ብክለት ያስከትላሉ። አንፈልጋቸውም" ትላለች ኪም።
ኤአይ የቴክኖሎጂውን ዘርፍ በፍጥነት እየቀየረ ቢሆንም በቀጣይ አሥርት ዓመታት "የሰው ልጆችን ሊያጠፋ" የሚችልበት ዕድል እንዳለ ባለሙያዎች እያስጠነቀቁ ነው።
የዳታ ማዕከሎች የውሃ ሃብትን ጨምሮ በአካባቢ ላይ የሚያሳድሩት ጫና በርካቶችን ያሰጋል።
አሁን ላይ በስኮትላንድ ያለው ግዙፍ የኤአይ ዳታ ማዕከል ዳታቪታስ ነው። የሚጠቀመው የኤሌክትሪክ ኃይል 12 ሜጋ ዋት ይገመታል።
በቅርቡ ሊገነቡ ዕቅድ የተያዘላቸው የዳታ ማዕከላት እስከ 1,000 ሜጋ ዋት የሚያስፈልጋቸው ሲሆን፤ ይህም በዓለም ትልቁ ያደርጋቸዋል።
የስኮትላንድ የአካባቢ ጥበቃ ንቅናቄ ማኅበራት ታዳሽ ኃይል ጥቅም ላይ እንዲውል ጫና እያሳደሩ ነው።
'ፍሬንድስ ኦፍ ዘ ኧርዝ' የተባለውን ንቅናቄ የምትመራው ኪም ፕራት እንደምትለው የዳታ ማዕከላት ግንባታን በተመለከተ ሕዝቡ ውሳኔ መስጠት አለበት።
"እነዚህ ማዕከላት ለግዙፍ የቴክኖሎጂ ኩባንያዎች ከፍተኛ ገንዘብ ያስገኛሉ። ጉዳቱ ደግሞ ለስኮትላንድ ሕዝብ ይተርፋል" ትላለች።
ግንባታቸው ከፍተኛ ኢነርጂ ስለሚጠይቅ በአካባቢ ላይ ጉዳት እንደሚያስከትሉ ታስረዳለች።
የስኮትላንድ መንግሥት በበኩሉ የማዕከላቱ ግንባታ ከሕዝብ ጠቀሜታ አንጻር እንደሚታይ ይገልጻል።
የስኮትላንድ መንግሥት ቃል አቀባይ እንዳሉት፤ የኤአይ ዳታ ማዕከላት ከመገንባታቸው በፊት ዕቅዳቸውን ለሚኒስትሮች አስገብተው ከአካባቢ ጥበቃ አንጻር ግምገማ ይከናወናል።